Við erum komin heim Ætlum að fara upp í sumarbústað um helgina.

Annars ef e-r vill ná í okkur erum við með gömlu gsm númerin:

Magnea: 8655581

Jón Bjarni: 8207225

Það er búið að vera frábært hér hjá okkur í Chicago. Endalaust mikið að skoða. Við verðum að koma aftur hingað til að skoða meira. Borðuðum heima hjá Bob, vini hans Jóns, í gær, það var mjög gaman líka. Dóttir þeirra sem er 16 ára skilur ekki hvað við erum að hanga með foreldrum hennar, sem eru á sama aldri og foreldrar Jóns Bjana

Nú erum við á flugvellinum í Chicago. Fluginu okkar var cansellað, svaka fjör. Áttum að fljúga klukkan 13.15, fáum líklega ekki flug fyrr en 16.15. Við vonum að við náum fluginu okkar frá Minneappolis í kvöld og þá heim í fyrramálið. Þetta verður allt að koma í ljós, rosa gaman hjá okkur að bíða á flugvellinum og vona það besta!

Ég skilaði ritgerðinni á afmælisdaginn minn, það var mjög gaman !! 

Við erum búin að tæma allt úr íbúðinni okkar sem á að fara með til Íslands og setja í gám. Hann á að vera lagður af stað með lest til Virginíu. Við búum núna hjá Óla og Charlotte. Þau voru svo yndisleg að taka við okkur heimilisleysingjunum í nokkra daga. Við eigum þó eftir að klára að tæma íbúðina okkar og þrífa hana. Gerum það eftir helgi. Ætlum að slappa aðeins af og njóta þess að vera í Seattle.

Erum ekki enn að fatta að við séum bráðum að fara að flytja héðan! Ekki einusinni þó að íbúðin sé orðin næstum tóm og við hjá Óla og Charlotte!! Við eigum svo sannarlega eftir að sakna als og allra hér!!

Allt að verða tilbúið fyrir Meistara Magneu

Ég ætla að fara að prenta ritgerðina núna á eftir og skila henni í fyrramálið, á afmælisdaginn minn . Svo ætlum við að fagna skilum og afmælinu á föstudaginn , en einnig að kveðja þá sem verða eftir í hinni yndislegu Seattle borg

Við erum búin að panta okkur flug heim. Förum frá Seattle 29. mars til Chicago og komum svo til Íslands að morgni 4. apríl.

Sjáumst bráðum!

Varði verkefnið í gær!!! Það gekk bara glimrandi vel og ég mun útskrifast með meistaragráðu eftir að ég skila ritgerðinni inn til skólans

Eftir vörnina fórum við á Finn MacCools (írskan pöbb) að fagna áfanganum

Gærdagurinn var ótrúlega góður!!!

Jæja, bara 2 dagar þangað til ég á að verja ritgerðina mína. Ég er búin að vera að undirbúa kraftbendils kynningu og æfa mig að koma fram á ensku!

Ver ritgerðina föstudaginn 9. mars klukkan 16.00. Hlakka mikið til þegar það verður búið!

Í gær var frábært veður hér, 17°C og sól, en ég var inni að undirbúa kynninguna.

Það er allt of mikið að gera hjá mér til að hafa tíma til að blogga. Ákvað að láta ykkur samt vita að við erum enn á lífi. Foreldrar Jóns Bjarna eru í heimsókn svo Jón sér um að sýna þeim borgina og verslanirnar á meðan ég læri og læri.

Það er stutt eftir, ver ritgerðina 9. mars!

Ef ég finn mér tíma blogga ég, annars er líklegt að það verði lítið skrifað hér fyrr en eftir 16. mars. Þá þarf ég að vera búin að skila endanlegu eintaki af ritgerðinni.

Á sunnudaginn komum við saman 8 Íslendingar og Armin til að fórna okkur í að fylgjast með því að Súperskálin og þá sérstaklega skemmtiatriðið í leikhlé færi velsæmilega fram svo að fleiri amerísk börn lendi ekki á vegi glötunar eftir að hafa séð brjóst. Ég veit nú satt að segja ekki hvernig börnunum sem horfðu á Prins skemmta eigi eftir að vegna?! En honum Arnari, syni Dr. Gunna, varð svo mikið um að hann ákvað bara að leggja sig þar til að leikurinn var næstum búinn. Ég tel þó mjög líklegt að hann hafi náð að jafnað sig á ósköpunum. Skemmtiatriðið var þó mun betra en það sem var í fyrra. Einnig var leikurinn að mínu mati mun skemmtilegri, þó að Seattle Sehawks hafi leikið til úrslita í fyrra. Eins og fylgir svona Súperskálar sunnudögum, átum við öll yfir okkur af kökum og snakki, en ótrúlegt en satt að enginn varð mikið ölvaður af bjórdrykkju.

Fyrir þá sem ekki vita þá kalla ameríkanarnir úrslita leikinn í ruðningi Súperskálina (e. Super Bowl). Þeir eru svo vitlausir að kalla þann sem vinnur heimsmeistara, þetta eru bara lið innan Ameríku að keppa!

 Fyrir utan þennan stórkostlega sunnudag hefur lífið að mestu gengið sinn vanagang: læra, borða og sofa! Það hefur e-ð lítið verið spilað í þessari viku og þeirri síðustu, enda flestir í miðannaprófum. Ég er að verða nokkuð stressuð, enda alltaf að styttast í að lokaverkefnið þurfi að vera tilbúið.

Búin að setja inn myndir frá ferðinni okkar í flugsafnið og frá Súperskálar sunnudeginum inn hér til vinstri!

Það er nú ekki mikið að frétta úr Seattle. Ég er bara að læra alla daga fram á kvöld. Kíki í ræktina stundum inn á milli. Á sunnudaginn tók ég mér þó frí og þá fórum í Boeing flugsafnið. Jón skemmti sér konunglega. Við fórum meðal annars um borð í concorde vél. Svo erum við auðvitað af og til að spila Settlers. Set kannski inn myndir frá flugsafninu við tækifæri.

Við horfðum auðvitað á Baunana vinna okkur í 8 liða úrslitunum um daginn. Sátum við skrifborðið mitt hér í skólanum, ég, Jón Bjarni, Solla, Laila og Ingimar. Ég var ótrúlega svekkt eftir þennan leik

Ætli það sé ekki kominn tími til að blogga smá. Að hefur nú ekki mikið gerst hjá okkur svosem. Ég búin að vera á fullu að vinna á rannsóknarstofunni og að skrifa ritgerðina og að vinna úr gögnunum mínum. Það er nóg eftir þannig að ég verð að halda vel á spöðunum, skrifa minn hér en meira í ritgerðina. Ég á því alveg von á að ég verði ekkert allt of dugleg að skrifa hér þar til ritgerðin er tilbúin. Ég hef líka e-ð lítið að skrifa um þar sem hver dagur er öðrum líkur við verkefnið mitt.

Þó að mestur tími fari í að vinna að lokaverkefninu mínu, lít ég nú stundum upp til að skreppa í bíó eða spila Settlers eða leika mér í X-box tölvunni hans Jóns.

Síðasta vika var svolítið skrítin hér hjá okkur. Aðfaranótt sunnudags (14.1.)  fengum við þau sorgartíðindi að amma hans Jóns Bjarna væri látin. Þó að það hefði verið ljóst að það væri að fara að koma að þessu er maður aldrei undirbúinn undir svona tíðindi. Það tók Jón Bjarna um tvo daga að ákveða hvort hann ætlaði að fara heim í jarðaförina. Það er um 20 klukkustunda langt ferðalag hvora leið með millilendingum og mikill tímamismunur á milli Reykjavíkur og Seattle, því ákvað Jón að fara ekki. Sem kom svo á daginn að var góð ákvörðun, því aðfaranótt þriðjudags byrjaði aftur að snjóa. Veðrið er búið að vera mjög undarlegt hérna í allan vetur, óvenju mikill vindur og óvenju mikið frost og snjókoma. Það er því ekki víst að við hefðum komist út á flugvöll og ef við hefðum komist, þá er ekki víst að ég hefði komist heim aftur. Auk þess var einhverju flugi frestað. Því hefði Jón líklega misst af vélinni til Íslands!

Gleðilegt nýtt ár!

Við höfðum það mjög fínt yfir jólin og áramótin. Lágum í leti, lásum og átum góðan mat og kökur.

Þetta var öðruvísi aðfangadagskvöld fyrir okkur Jón. Við vorum með 6 síldarrétti og 2 laxa rétti í forrétt að pólskum sið. Í aðalrétt vorum við með buffaló sem smakkaðist mjög vel. En við vorum þó frekar södd eftir allan fiskinn. Eftir allt þetta át tókum við okkur frí frá átinu. Mike var æstur í að fara að opna pakkana. Svo eftir uppvaskið settumst við niður með nóakonfekt og opnuðum pakkana. Eftir upptökuna fengum við okkur svo eftirréttinn, heimatilbúinn tobleroneís.

Við tókum lífinu rólega á jóladag, ég var aðallega í því að lesa. Svo fengum við okkur hangiket, uppstúf og jólaöl í kvöldmat.

Á annan í jólum skelltum við Jón okkur með Tuma og Mary á ballettsýningu um Hnotubrjótinn. Sýningin er sett upp fyrir hver jól af dansflokknum hér í borg. Það var mjög fínt að kíkja á ballett sýningu svona einusinni.

Hér eru nokkrar myndir frá jólunum okkar.

Á föstudaginn skelltum við okkur í ferðalag á Ólympíu skagann. Tókum ferju yfir Puget Sound til Bainbridge Island og keyrðum til Dungeness sem er um 8 km langt rif með vita á endanum. Klukkan var orðin svo margt að við náðum ekki að labba mikið svo við ákváðum að koma aftur daginn eftir og ganga út að vitanum. Fórum því til Port Angeles og fundum okkur mótel að gista á og mexíkanskan veitingastað að eta á. Röltum svo aðeins um dauðann miðbæinn áður en við komum okkur í háttinn. Tókum laugardaginn snemma. Byrjuðum á að fara inn á verndarsvæði indíána rétt utan við bæinn, héldum að þar væri e-ð að skoða, en komumst fljótlega að því að á svæðinu voru nánast bara subbuleg hús, með enn subbulegri görðum og nánast einu íbúarnir sem við sáum voru hundar og fullt af þeim. Við komum okkur því bara í burtu og upp á Hurricane Ridge, sem er partur af Olympíu fjöllunum, þar var mjög fallegt. Þar gegnum við aðeins um og nutum veðurblíðunnar og útsýnisins. Því næst fórum við aftur niður að rifinu og gengum út að vitanum, fengum að fara upp í vitann að skoða, en gengum svo til baka aftur, um 17.6 km báðar leiðir frá bílastæðinu. Þvínæst fórum við til baka heim sömuleið og við komum.

Við tókum gamlársdag mjög rólega enda þreytt eftir göngu laugardagsins. Þetta voru mjög róleg áramót. Við fengum okkur kónga-krabbalappir í forrétt, sem smökkuðust mjög vel. Svo hunangsskinku í aðalrétt. Eftir matinn spiluðum við Settlers með Riddara viðbótinni sem Jón fékk í jólagjöf frá mér, ég vann auðvitað eins og vanalega! Eftir spilið fórum við upp í Queen Ann og horfðum á 7 mínútna langa flugeldasýningu á Nálinni á miðnætti. Komum svo aftur heim, skáluðum fyrir nýju ári í freyðivíni, borðuðum svo köku. Við vorum öll orðin uppgefin og drifum okkur bara í háttinn.

Nýársdag höfum við svo aftur tekið rólega, ætlum að gæða okkur á hangiketi í kvöldmat, tvö ein, því Mike fer í dag aftur á heimavistina. Ætlum því að hafa kósý kvöld tvö ein þar sem alvara lífsins byrjar aftur á morgun. Ég mun líklega eyða öllum janúarmánuði inni á rannsóknastofunni, kannski kíkja heim yfir nóttina til að sofa.

Það eru myndir frá ferðalaginu og áramótunum á myndasíðunni, tengill 22 hér til vinstri.

Síðast en ekki síst sendum við Erlu Ösp afmæliskveðju! Hún er orðin 12 ára!

Við viljum óska öllum

Gleðilegra jóla

Við eigum eftir að hafa það mjög gott yfir jólin, slappa af og borða fullt af góðum mat. Mike ætlar að vera með okkur á yfir hátíðina þannig að við erum með blöndu af íslenskum og pólskum jólum. Ég var að setja yfir hangiketið sem var að koma með FedEX frá foreldrum hans Jóns Bjarna. Fyrri sendingin frá þeim týndist!!! En sem betur fer borgaði FedEx á Íslandi nýjan pakka fyrir okkur svo við erum með hangiket, malt og appelsín, Ora grænar baunir, 2 kg af nóa konfekti frá mömmu og pabba líka. En því miður ekkert laufabrauð þar sem það týndist með fyrri pakkanum. Myndirnar eru frá jólatrésleiðangrinum sem við fórum í fyrir viku síðan!

Vonum að allir hafi það gott yfir hátíðina!

Við fengum aftur rafmagn seinnipartinn í gær. Og Jón er orðinn hress eftir veikindin. Þannig að þetta lítur allt mun betur út núna fyrir okkur. En það voru enn fullt af heimilum án rafmagns í gærkvöldi.

Þetta var mesti stormur sem komið hefur í 13 ár hér. Mesti vindhraði í vindhviðu mældist um 32 m/s sem er víst met hér. Þegar við Jón fórum að versla seinnipartinn í gær sáum við fullt af trjám sem höfðu rifnað upp með rótum og lágu ofan á húsum og bílum. Það féll eitt tré fyrir innganginn á húsinu við hliðina á Jill og Dick. Það virðast nú ekki vera nein svakaleg rótarkerfi á þessum stóru trjám. Þegar maður sér allar skemmdirnar sem þessi stormur olli skilur maður aðeins betur af hverju það eru ekki svona risa tré á Íslandi þar sem er aðeins vindasamara en hér.

Nú er mjög fínt veður hér en frekar kalt, aðeins 5°C.

Það er búið að vera brjálað rok og rigning, með hléum, í 3 daga hér. Í fyrradag fór rafmagnið af heima en var komið á seinnipartinn þegar við komum heim. Í gær dag stíflaðist niðurfallið í bílageymslunni heima hjá okkur. Bílageymslan er yfirbyggð en opin að hluta. Þeir sem hafa komið í bílageymsluna vita að niðurfallið er RISA stórt. Það semsagt fuku svo mikið af laufblöðum niður í bílageymsluna að þau stífluðu niðurfallið. Svo rigndi eins og ég veit ekki hvað svo það safnaðist um 10 – 15 cm af vatni yfir alla geymsluna. Þaðan lak vatnið svo inn á stigaganginn og inn í kjallaraíbúðina.

Jón Bjarni var fárveikur í gærkvöld og í alla nótt, þ.a. við sváfum ekki mjög mikið. Ekki nóg með að Jón þyrfti endalaust að fara inn á bað í alla nótt, í þokkabót fór rafmagnið aftur af svo hann þurfti alltaf að hafa vasaljós með sér. Jón hefur orðið veikur tvisvar á þessu ári, en fram að því hafði hann ekki orðið veikur síðan áður en við kynntumst. Hann er því heima í dag og ég fór seint af stað í skólann. Síðast þegar ég vissi var rafmagnið ekki enn komið á heima.

Þegar ég labbaði um á skólalóðinni áðan sá ég brotin tré og greinar sem hafa brotnað af trjánum um allt. Fjórir Seattle búar hafa látið lífið í þessu óveðri. Yfir milljón heimili eru rafmagnslaus, svo óvíst er hvenær það kemur aftur á heima hjá okkur. Önnur hrina á svo að ganga yfir í kvöld eða nótt

Kynningin á GIS verkefninu gekk bara mjög vel s.l.föstudag. Við vorum lang flottastar ég og Mary. Ég komst að því að það er ekkert svo erfitt að tjá sig á ensku fyrir framan fullt af fólki, um e-ð sem maður hefur verið að vinna að og veit mikið um.

Á þriðjudaginn fórum við í jólapartí jarðtæknideildarinnar til prófessors Kramers. Það var mjög fínt allir komnir í jólaskap. Það mætti þó aðeins helmingur nýnemanna, hin eru of stressuð til að gefa sér tíma til að mæta, enda eiga þau ennþá próf eftir.

Ég er ennþá bara að vinna á fullu í lokaverkefninu og verð alveg fram að jólum. Er að hugsa um að taka mér um eina viku í jólafrí.

Við Jón erum komin í jólaskap, búin að setja upp jólaserur, kaupa jólastjörnu (blóm) og baka lakkrístoppa með lakkrís í boði Kristínar að vanda. Takk fyrir lakkrísinn elsku Kristín mín, það væru ekki jól án toppanna.

Ég gaf nokkrum innfæddum að smakka harðfisk. Sahra var fljót að spýta honum út, en Ian fannst þetta bara nokkuð gott. Scott var svo kurteis að kyngja sínum þó honum fyndist hann ekki góður. Yimin sem er frá Taívan fannst fiskurinn mjög góður og át hann með mér og Sollu.

Varðandi þennan gyðinga prest sem fór að skipta sér af jólaskreytingunum á flugvellinum hér í Seattle. Þá var það víst tilgangur hans með því að setja út á jólaskreytingarnar að fá fólk til að gera sér grein fyrir öðrum trúarbrögðum líka. Flugvöllurinn tók þá allt niður því þeir segjast ekki hafa efni á að setja upp skraut frá öllum trúarbrögðum fyrir allar hátíðir. Gyðingar í landinu hafa víst orðið fyrir ofsóknum vegna þessa máls.